La Candelouso à Marsiho

A Marsiho, pèr la Candelouso, li crespo soun en generau remplaçado pèr uno pastissarié prouvençalo: Li naveto de Marsiho.
Segoun la legendo, aquesto naveto simbouliso la barco qu'amenè li Santi-Marìo sus lou ribage de Prouvenço. Mai pèr d'autri, la barco simboulisado sarié aquelo de la vierge nègro de l'abadié Sant-Vitou que se sarié tancado au sègle XIIIèn sus li berjo dóu Lacydon (lou vièi port).
 Es pèr remembra aquéli legendi, moussu Aveirous, foundadou dóu four i naveto en 1781, qu'agu l’ideio de douna à soun bescuech la formo d’uno barqueto.

Chasco annado, pèr Candelouso, à l’abadié Sant-Vitou, l’estatuo de la vierge nègro es eispausado e uno proucessioun rassemblo de fidèus emé de candèlo verdo.

Segoun la cresenço poupulari, aqueli candèlo verdo proutéjarié l’oustau de l’aurage e de l’espri marri à l’ouro de la mòrt. Aquèlo coustumo tipicamen marsiheso es forço anciano que remountarié à la fin dóu sègle XVIèn.