A quand l’ensignamen de l’Istòrio loucalo dins lis Escolo ?

L’Escolo de la républico sèmblo toujous pas prèsto à se dubrir i diferents pòples de Franço.
Aprene i  jouino  l’Istòri e la géogràfio de Franço e dóu mounde es uno bèn nòblo e nécéssari causo de la de Mariano mai aquest ensignamen es malurousamen inadapta quant n’es pas de couneissenço errounado que soun ensigna à nos jouino. Es lògic d’ensigna i Avignounenc li Crousado mai d’oublida de parla de la présencio papalo dins la vilo. Es lògic de parla  en Arlo de Sant-Louis mai pas dóu couronamèn de L’Empraire Germanic Frederic1er ( Frederi Barborousso) en qualita de Rei de Bourgogno e d’Arlo.

A quau sèr d’aprène à nos escoulans l’Istòri o la géogràfio de territori de l’autro bout dóu mounde, de countrado ounte metran subramèn jamai li pèd se l’Istòri de sa tèrro es pèr éli un mistéri, se aqueli jouino soun pas soulamen en mesuro de couneisse la géografio de l’endré (cantoun, despartamen o régioun) ounte vivon!

Encaro mai dessena, au nom de l’unita naciounalo, lou fa de faire aprène uno Istòri traficado. Ansin, lou Ministèri de l’Educacioun Naciounalo a pas vergougno de glourifica la Crousado  Albigèso à bésièrs o Montségur o la Révolucioun Francèso en Vendéio o en Vau-Cluso, d’aprène i miéjournen que 1914 es sinounimo d’Unioun naciounalo alaro que Franço a de cadabro plen sis armàri! Mai lou principau es de manténi lou mito d’uno Franço à l’Istòri uniformo. Pèr la suito, la pensado uniformo e atrofiado de nos fièu sara mai eisido à manipula pèr lou poudé.