Pau Ruat (Segoundo partido)

Segoundo partido: L’Editour-Felibre

Avèn vist l’ascensioun soucialo dóu libraire Pau Ruat mai aquèu fugué tambèn un ardènt aparaire de la lengo nostro.

Bèn que couneissènt Roumaniho (que l’avié recoumènda à Marsiho) despièi 1880, Ruat prèn vertadièramen countat emé lou Felibrige en 1898 en gagnant lou proumié prèmi d’un councours literàri ourganisa pèr lou paire Xavièr de Fourvières (ounte s’agis d’escrièure en prouvençau lou discours d’un candidat à la deputacioun. L’an d’après, Pau Ruat se véi decerna pèr la mantenènço de Prouvenço lou titre de Felibre mantenèire. A parti d’aco Ruat s’engajo de touto sa persouno dins la Respelido Prouvençalo.

En 1910, à la Santo Estello de Perpignan, lou baile dóu Felibrige qu'es malaut, Pau Ruat es envesti pèr soun ami lou Capoulié Valèri Bernard, dóu titre de Baile prouvisòri.

En 1918, es proumougu Majourau dóu Felibrige.

Pau Ruat fuguè tambèn lou vice-cabiscou de l’Escolo de la Mar en 1909.

De mai, la vila di Cigalo, soun oustau, fuguè un liò maje dóu felibrisme marsihès.

Fuguè mai que mai un editour-Felibre :

En 1897, coumenço d’edita de libre en Prouvençau emé Li Cant  dóu terraire de Charloun Rieu.

Pèr seguido, edito forço oubrage tau que La Cuisinière provençale de Reboul (publicacioun ininterroumpudo despièu 1897), la Pastouralo Maurel (que n’en a aquist li dre en 1901), mai tambèn d’obro de X. de Fourvièro o de V. Bernard (tau que L’Aubre en Flour); sens doublida si propris obro tau que Aprendissage de la vido en 1910 (auto-biougrafîo coumpletado dins l’edicioun de 1931 de counsèu à soun felen)o Viéure sa Vido en 1920 (auto-biougrafìo).

Pau RUAT (proumièro partido)

I’a un an, fasènt de recerco sus Tuleto, vilajoun vesin d’encò mièu, toumbère sus l’Istòri descouneigudo d’un òme que fuguè uno persounalita impourtènto dóu Felibrige e lou mai impourtènt libràri de Marsiho dins lis annado 1900 avans de toumba pièi pau à cha pau dins l’óubli.

                                                

Quau es Pau RUAT ?

De fièu de païsan à Présidènt-foundadou dóu sindicat di libraire de Prouvènço :           Uno ascèncioun soucialo remirablo.

Pau RUAT nasquè lou 15 de nouvèmbre 1862 à Tuleto (Droumo) d’un paire païsan e d’uno maire firuso. A douge ans, dèu travaia mai trop fréule pèr veni païsan, vèn aprendis-libraire pièi coumès-libraire à Carpèntras en 1874. Dèu forço trima pèr gagna sa vido. En 1931, descriéura aquesto jouinesso dins soun libre Aprendissage de la Vido. A 18 ans, sus la recoumandacioun de Roumaniho, travaio coume coumès-libraire à Marsiho avans de s’istala à soun comte très ans après e recroumpe la librarié de l’universita (uno di mai bèlo de Franço) en 1889.

En 1892, vèn Presidènt-foundadou dóu sendicat di libraire de Prouvènço e participo tambèn à la foundacioun de la cambro sindicalo di libraire de Franço.

En 1914, Ruat cedo sa librarié e oustau d’edicioun à soun bèu-fiéu Augustin Tacusel

Mouriguèro lou 13 de desèmbre 1938 à La Valentino (Marsiho).

Un precursour dóu tourisme

En 1897, Pau Ruat foundo la Soucieta dis Escourrèire Marsihès
En 1902, es lou co-foundatou dóu sindicat d’iniciativo de Marsiho (un di proumié de Franço). Aquesto memo annado, se met à coumercialisa de carto poustalo ilustrado.

Un vin que fa dansa li cabro; Carle GALTIER

L’estructuro narativo dóu raconte: Lou registre espacio-tempourau: A l’eisepcioun de “La medaio”(ounte l’Istòrio es narrado à l’autour mai se debano dóu tèms de Napoléon III, dins lis annado 1850) e de “L’autre coustat de la taulo” e “ Un vin que fa dansa li cabro” (que se debanon dins lis annado 50-60 e dins lis annado 80), li conte se debanon dins la jouinesso dóu naratou, dins la proumièro partido dóu sègle XX^èn. Li conte se debanon en Prouvenço à l’eisepcioun de La medaio mounte uno partido de l’istòrio se debano à la cour de Napoleon III.

Représentacioun de la soucieta:  Aqueli conte moustron la soucieta ruralo prouvençalo dóu sègle XXèn e l’evoulucioun de la soucieta à travès la revoulucioun industrialo e li 30 glouriouso. 

Mèso en perspeitivo de l'òbro: Dóu fa dóu gènre literàri, de l’espoco d’escrituro,  dóu registre spacio-tempourau o encaro de la tounalita d’ùni conte, aquèu recuei se póu faire lou paralèle emé li conte de Jan-Glaude Rey.      Verai, soun de conte escri pèr d’autour  prouvençau de la segoundo mita dóu  sègle XX e dins la majo-partido d’aqueli conte que se debanon dins lou courrènt dóu sègle XX^èn (e  quasi-touti en Prouvènço), avèn uno intervencioun (o la presènci) dóu countaire. De mai, la tounalita d’ùni conte es fantastico ( à la fin àvèn toujou un  doute sus la versembalanço de l’istòri)  o trufarèu (soun de cascareleto).

L’insercioun d’elemens istouri dins li conte:  Dins “la medaio”, l’autour cito la vengudo de l’emperaire Napoleon III pèr veni counstata lis inoundaciouns dóu Grand Rose en 1854 (èro en vertat en Jun 1856).

Carle GALTIER, Un vin que fa dansa li cabro, Conte Prouvençau, ed Librairie Contemporaine, 2003, Montfaucon